"დეკანოზი გიორგი მამალაძე არათუ გადაადგილებას, წამოჯდომასაც ვერ ახერხებს" - თორნიკე მამალაძე

სჯავრდებული დეკანოზის, გიორგი მამალაძის ოჯახი სექტემბრიდან აქციებს აანონსებს. ამის შესახებ „ ინტერპრესნიუსს“ დეკანოზ გიორგი მამალაძის ძმამ, თორნიკე მამალაძემ განუცხადა.

მისივე განმარტებით, აქციების რეჟიმზე გადასვლის მიზეზი ის გარემოებაა, რომ „საპატრიარქოს წარმომადგენლებმა ოჯახი მოატყუა“.

„სექტემბრიდან აქციების რეჟიმზე გადავალთ. საპატრიარქოს წარმომადგენლებმა მითხრეს, რომ თუკი გავჩუმდებოდით, ჩემს ძმას გამოუშვებდნენ, მაგრამ მოგვატყუეს. სამწუხაროდ, მე ამ საკითხში გამოუცდელი ვიყავი. სექტემბრიდან ასევე ვაპირებ იმ თემებზე საუბარს, რაც თითოეულმა ეპისკოპოსმა იცის, მაგრამ ვერ საუბრობს. ვაპირებ იმ წერილების გასაჯაროებას, რომლებიც ჩემმა ძმამ გამოაგზავნა და ვაპირებ იმ თემებზე საუბარს, რასაც საპატრიარქო დღემდე მალავს და არ უნდათ, რომ საზოგადოებამ გაიგოს. ეს ყველაფერი დაადასტურებს იმას, რის გამოც ჩემი ძმა გაწირეს და საპყრობილეში გამოკეტეს. მამა გიორგი მამალაძე, რომ უდანაშაულოა ყველამ იცის. სასამართლო ღია რომ ყოფილიყო, ამას თითოეული ჩვენგანი კარგად დავინახავდით, თუმცა სწორედ ამიტომ დახურეს სხდომები, რომ საზოგადოებას ჩემი ძმის სიმართლე არ დაენახა“, - განაცხადა თორნიკე მამალაძემ.

დაკავებული სასულიერო პირის ძმის ინფორმაციით, მსჯავრებული გიორგი მამალაძის ჯანმრთელობის მდგომარეობა უკიდურესად მძიმეა.

„მე ჩემი ძმა მოვინახულე და მისი მდგომარეობა უკიდურესად მძიმეა. ის დამოუკიდებლად არათუ გადაადგილებას, არამედ წამოჯდომასაც კი ვერ ახერხებს. მას მარჯვენა კიდურები სრულიად პარალიზებული აქვს , თებერვლის 15 რიცხვიდან დღემდე ამ მდგომარეობაში იმყოფება და წოლით რეჟიმში აგრძელებს ცხოვრებას“, - აღნიშნა მან.

ოქტომბერი 2019
ორშ.სამშ.ოთხშ.ხუთშ.პარას. შაბათიკვირა
30123456
78910111213
14151617181920
21222324252627
28293031123