ხაშურის მუნიციპალიტეტის სოფელ ოსიაურში კულტურული მიმკვიდრეობის ძეგლის, ვეზირიშვილების სასახლის სახურავი ჩამოინგრა. ნგრევას მსხვერპლი არ მოჰყოლია. ვეზირიშვილების სასახლის გვერდით სკოლა მდებარეობს და ავარიული შენობა მოსწავლეებს საფრთხეს წლების განმავლობაში უქმნის. რამდენიმე წლის წინ მისი დემონტაჟი იყო გადაწყვეტილი, მაგრამ ხაშურელი ახალგაზრდების აქტიური ჩართულობით ეს პროცესი შეჩერდა და შენობას კულტურული მიმკვიდრეობის ძეგლის სტატუსიც მიენიჭა, თუმცა მისი რეაბილიტაცია ამ დრომდე არ დაწყებულა.