გამოცდების ეროვნული ცენტრის ხელმძღვანელი 23 აგვისტოს ჩარიცხვების შესახებ დამუშავების პროცესში არსებული ინფორმაციის გავრცელებასთან დაკავშირებით, რასაც აბიტურიენტებისა და განათლების დარგის სპეციალისტების მხრიდან უარყოფითი შეფასებები მოჰყვა, განმარტებებს აკეთებს. მაია მიმინოშვილს მიაჩნია რომ ეს ტყუილუბრალოდ ატეხილი აჟიოტაჟი იყო. მისი განმარტებით, პროგრამა სატესტო რეჟიმში მუშაობდა, სმს -ის სერვისი არ იყო გამორთული, რის გამოც რამდენიმე აბიტურიენტმა ჩარიცხვების შესახებ არასრული ინფორმაცია შეცდომით მიიღო. მიმინოშვილი, აქვე აცხადებს, რომ  აბიტურიენტების მიერ დროზე ადრე მიღებული ინფორმაცია, რაც ჩარიცხვებს ეხებოდა, მნიშვნელოვნად არ შეცვლილა. კორექტირება მხოლოდ გრანტებთან დაკავშირებით განხორციელდა. შეგახსენებთ, რომ 23 აგვისტოს, 23:00 საათზე გავრცელდა ინფორმაცია იმის შესახებ, რომ გამოცდების ეროვნულმა ცენტრმა უმაღლეს სასწავლებლებში ჩარიცხვების შესახებ ინფორმაცია გაავრცელა და სტუდენტთა ნაწილმა მოკლე ტექსტური შეტყობინების სახით ჩარიცხვების შესახებ ინფორმაცია მიიღო, თუმცა პროცესი 1 საათში შეწყდა.