გორი  რიოს ოლიმპიადაზე წარმოდგენილი სპორტსმენების საგულშემატკივროდ ემზადება. ქალაქში უკვე გამოჩნდა გორელი სპორტსმენების ბილბორდი და ფანკლუბი "მოგვერდი“ შეიქმნა, რომელიც დღეს  საგანგებო ფოტოსესიას გამართავს. ფოტოსესია გორის ბავშვთა და ახალგაზრდობის ცენტრში 12:00 დაიწყო და16:00 საათამდე გაგრძელდება, რა დროსაც ნებისმიერ მსურველს მიეცემა შესაძლებლობა ფოტოები გადაიღოს საგანგებოდ დამზადებულ მაისურებში და თანაქალაქელი სპორტსმენების მხარდაჭერა დააფიქსიროს. ფოტოსესია ფანკლუბ "მოგვერდის“ პირველი აქტივობაა. კლუბის ორგანიზატორები მთელი ოლიმპიადის მანძილზე არაერთი საინტერესო ღონისძიების გამართვას გეგმავენ.  რიოს ოლიმპიადის მიმართ გორელების ინტერესი წელს განსაკუთრებით მაღალია, რადგან საქართველოს ეროვნული ნაკრების გამარჯვებისთვის 39 სპორტსმენს შორის გორის საჭიდაო სკოლებში აღზრდილი 5 მოჭიდავე - ვაჟა მარგველაშვილი, ლაშა შავდათუაშვილი, ბექა ღვინიაშვილი, ლადო ხინჩეგაშვილი და გენო პეტრიაშვილი იბრძოლებს. რიოს ოლიმპიურ სოფელში საქართველოს დროშის აღმართვის ცერემონიალი დაგეგმილია 2 აგვისტოს, გახსნის ცერემონიალი კი 5 აგვისტოს სტადიონ “მარაკანაზე” ჩატარდება.