ეროვნულ სასწავლო ცენტრ „კრწანისში“ სამეთაურო-საშტაბო სწავლება „დიდგორი 2016“ დაიწყო. ოფიციალური ცერემონიალი საქართველოს თავდაცვის მინისტრმა, თინათინ ხიდაშელმა და საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ გახსნეს. სწავლების სცენარი ომის რეალურ მოვლენებთან მიახლოებულ ვითარებაზეა დამყარებული. წვრთნების დროს თავდაცვითი ოპერაციები ვირტუალური მოწინააღმდეგის მიმართ მოდელირებულ გეოპოლიტიკურ გარემოში განხორციელდება. „დიდგორი 2016-ის“ სწავლება ერთი კვირის განმავლობაში გაგრძელდება და მასში 700-მდე სამხედრო - ოფიცრები, სერჟანტები და კაპრალები მიიღებენ მონაწილეობას. სწავლებაში ასევე ჩართულია ყველა სამთავრობო უწყების 80-მდე წარმომადგენელი.