მორიგი პროვოკაციული ქმედება საოკუპაციო ძალების მხრიდან, - ასე აფასებს სახელმწიფო უსაფრთხოების სამსახური საოკუპაციო ხაზთან მომხდარ ინციდენტს. უწყება მომხდართან დაკავშირებით განცხადებას ავრცელებს, სადაც ნათქვამია, რომ აღნიშნული ქმედება საოკუპაციო ძალების მხრიდან მორიგი პროვოკაციაა და საფრთხეს უქმნის მშვიდობასა და სტაბილურობას. განცხადებაში, ასევე, აღნიშნულია რომ ინციდენტის თაობაზე ინფორმაცია მიწოდებული იქნა ევროკავშირის სადამკვირვებლო მისიისათვის და ეს საკითხი იქნება ერთ-ერთი მთავარი განსახილველი თემა ინციდენტების პრევენციისა და მათზე რეაგირების მექანიზმის ფორმატის მომდევნო შეხვედრაზე, რომელიც ერგნეთში გაიმართება. შეგახსენებთ, რომ სოფელ კირბალის მიმდებარე ტერიტორიაზე, რუსმა სამხედროებმა ადგილობრივი - 50 წლის ზაქარია თაყაძის დაკავება გუშინ სცადს. თაყაძემ მათ წინააღმდეგობა გაუწია, საპასუხოდ კი მას ავტომატის კონდახით სცემეს.
| 
