თუ თეძოსა და წელის ზომების აღება მოგთხოვეს, არ დაიბნეთ - თქვენ დაავადებათა კონტროლის ეროვნული ცენტრის ახალი პროგრამის მონაწილე გახდით. პროექტი მედიასაშუალებებს დღეს ცენტრის ხელმძღვანელმა გააცნო. ამირან გამყრელიძის განმარტებით, მიზანი ქვეყანაში არაგადამდები, თუმცა პრობლემური და მზარდი დაავადებების რისკ-ფაქტორების დონის განსაზღვრაა. კვლევა ჯანრთელობის მსოფლიო ორგანიზაციის მეთოდით განხორციელდება. ეს კი შემდეგი მონაცემების შეგროვებას გულისხმობს:  ფიზიკური გაზომვები (სიმაღლე, წონა, წელისა და თეძოს გარშემოწერილობა, წნევა, პულსი), სისხლისა და შარდის საერთო ანალიზები, ალკოჰოლისა და თამბაქოს მოხმარების ინტენსივობა. პროგრამა 21 ივლისს იწყება და იგი საქართველოს ყველა რეგიონს მოიცავს.  შემთხვევითობის პრინციპით, 18-69 წლის 6 000-მდე პირი შეირჩევა. პროექტით გათვალისწინებული ყველა ანალიზი უფასოა.