საქართველოს პრეზიდენტი გიორგი მარგველაშვილი მიიჩნევს, რომ სამხედრო-სავალდებულო სამსახურის გაუქმების გადაწყვეტილება ინტენსიური კონსულტაციების შედეგად უნდა ყოფილიყო მიღებული. მისივე თქმით, ამ საკითხის განხილვა არ მომხდარა არც მთავრობის და არც უშიშროების საბჭოს სხდომაზე.
როგორც პრეზიდენტმა პრესკონფერენციაზე აღნიშნა, არ არის გაუქმებული არანაირი გაწვევა, არამედ არის პოზიცია, რომ არ მოხდეს კვოტის ათვისება თავდაცვის სამინისტროს მხრიდან.

„ეს არის განსაზღვრება იმისა, რა გადაწყვეტილებაც იქნა მიღებული. მე მინდა დავეთანხმო ბატონ პრემიერ-მინისტრს, რომ ასეთი გადაწყვეტილებები, მიუხედავად იმისა, რამდენად სწორია, ვეთანხმები თუ არ ვეთანხმები მე ამ გადაწყვეტილებებს, არ უნდა იყოს მიღებული ერთი თანამდებობის პირის მიერ, არამედ, უნდა იყოს განხილული კოლეგიალურად, როგორც მთავრობის სხდომაზე, ისე უშიშროების საბჭოში“,- განაცხადა მარგველაშვილმა.