მედია სკოლის პრესის ჟურნალისტიკის მოსწავლეები მიღებულ ცოდნას უკვე პრაქტიკაში ახორციელებენ. გორის მუნიციპალიტეტის გამგებლის მოვალეობის შემსრულებელტან ინტერვიუს ჩაწერის შემდეგ ისინი საკრებულოს თავმჯდომარეს შეხვდნენ და მათთვის აქტუალურ თემებზე კითხვები დაუსვეს. დავით რაზმაძემ მის სამუშაო ოთახში მისულ პატარა ჟურნალისტებს საკუთარი გამოცდილების შესახებ უამბო და შემდეგ მათ კითხვებს უპასუხა. მისი განმარტებით მოზარდებთან საინტერესო თემებზე მოუწია საუბარი. მედია სკოლის პრესის ჟურნალისტიკის ჯგუფის წევრები ჩაწერილი ინტერვიუებით სტატიების მომზადებას გეგმავენ. ტრენერის ინიციატივითა და ორგანიზებით, პრესის ჟურნალისტიკის ჯგუფის წევრები, უახლოეს დღეებში დევნილთა ჩასახლებებსაც ეწვევიან. მათ მიერ მომზადებული შერჩეული სტატიები კი ჟურნალში დაიბეჭდება. "ლიახვის ხეობა“ ამისთვის სპეციალურ რუბრიკას გამოყოფს. გარდა ამისა, პარალელურად ისინი გადაცემის მომზადებას გეგმავენ. ამის საშუალებას მათ ტ/კ "დია“ აძლევს. მედია სკოლა გორში საზოგადოება ბილიკის ბაზაზე მიმდინარე წლის 15 თებერვალს გაიხსნა. პროგრამა 3 თვიანია და მისი მოსწავლეები ამ პერიოდში ტელე-რადიო და პრესის მიმართულებით მოქმედი ჟურნალისტებისგან გამოცდილებას იზიარებენ, ასევე მედიის კუთხით უნარ-ჩვევებს გამოიმუშავებენ. პრესის ჟურნალისტიკის ტრენერი ნინო ჩიბჩიური მის ჯგუფს პროგრამის ფარგლებში კიდევ არაერთ საინტერესო სიურპროზს უმზადებს.