16 მაისს გროზნოში გამართულმა სკანდალურმა ქორწილმა საზოგადოების აღშფოთება გამოიწვია. ჩეჩნეთის ადმინისტრაციული რაიონის ნოჟაი-იურტოვკის პოლიციის მაღალჩინოსანი და რამზან კადიროვის მეგობარი, 47 წლის ნაჟუდ გუჩიგოვი 17 წლის ლუიზა გოილაბიევაზე დაქორწინდა. ლუიზა ნაჟუდის მეორე ცოლია, პირველი ცოლისგან პოლიციელს ახალშერთულ ცოლზე უფროსი ვაჟი ჰყავს. ქორწილის ირგვლივ მითქმა-მოთქმა მას შემდეგ ატყდა, რაც გამოცემა „ნოვაია გაზეტას“ ჟურნალისტმა, ელენა მილაშონამ დაწერა, რომ ნოჟაი-იურტოვკის მთავარი პოლიციელი არასრულწლოვანზე დაქორწინებას გოგონას ნების საწინააღმდეგოდ გეგმავდა. კადიროვმა ქორწილს "ათასწლეულის დღესასწაული" უწოდა და განაცხადა, რომ მან გოგონას მშობლებთან ხალხი გააგზავნა, რომლებსაც ქორწილზე თანხმობა დაუდასტურეს და აღნიშნეს, რომ 17 წლის გოგონა ჩინოვნიკზე საკუთარი ნებით თხოვდებოდა და ჭორებს გუჩიგოვს "ვიღაც ლიბერალები" უვრცელებდნენ. როგორც ჩანს, კადიროვი ქორწილში კარგად გაერთო. სკანდალური ქორწილის ხელისმოწერისა და კადიროვის მიერ შესრულებული ლეზგინკას კადრები ინტერნეტში გავრცელდა. წყარო: newposts.ge