“სუხიშვილების” ყოფილმა მოცეკვავემ, თეა დარჩიამ, საკუთარ სოციალურ ქსელში ვიდეო გამოაქვეყნა, სადაც იგი მოსწავლეებთან ერთად თვალზე ხელაფარებული ასრულებს ცეკვას. ეს ჟესტი სიმბოლური მას შემდეგ გახდა, რაც 20-21 ივნისის ღამეს, აქციის დაშლისას, რამდენიმე ადამიანმა თვალი დაკარგა.
ქორეოგრაფის მიერ გავრცელებულ ვიდეოს სოციალურ ქსელში არაერთი გამოხმაურება მოჰყვა. თეა დარჩიას ქმედება საზოგადოების ნაწილმა მწვავედ გააკრიტიკა, მათი აზრით, მან ბავშვთა უფლებები დაარღვია და ბავშვთა უფლებების დამცველებისგან შესაბამის რეაგირებას ითხოვენ.
სოციალურ ქსელში გამოთქმულ კრიტიკას თეა დარჩიამ “ფეისბუქის” პირად გვერდზე ასე უპასუხა:
“მე არც “ნაცი” ვარ და არც “ქოცი”. მე ქართველი ვარ, რომელიც ცეკვით გამოხატავს პროტესტს ნებისმიარი ძალადობისა და ოკუპაციის წინააღმდეგ!!!”, – წერს თეა დარჩია სოციალურ ქსელში.
თბილისის საკრებულოს ყოფილმა წევრმა სოსო მანჯავიძემ კი “ფეისბუქის” მეშვეობით თეა დარჩიას მიმართა:
“თეა დარჩიას პერფორმანსი ვიხილე და ჩემი ცეკვით ძლადობას ვაპროტესტებო. იქვე მხარდამჭერთა კომენტარებია,”ღმერთო რამდენი საიძულვილიაო. რაც გინდა ის გააპროტესტე, მაგრამ ბავშვებს ნუ რევ ამ პოლიტიკურ პროსტიტუციაში” – გაიგე? თუ ძალიან გიძნელდება ასეთი ელემენტარული რამეების გაგება? სულ გაგიჟდა ეს ხალხი, დასაბმელები გახდნენ”, – წერს მანჯავიძე სოციალურ ქსელში.
