ადგილობრივმა დავით კილაძემ თავის დაწვა, მოხსნილი სოციალური შემწეობის გამო სცადა. ის მუნიციპალიტეტის მერთან შეხვედრას და საკუთარ პრობლემაზე გასაუბრებას ცდილობდა, თუმცა, როგორც ამბობს გიორგი გურასპაშვილი არ შეხვდა. სწორედ ამის შემდეგ გადაწყვიტა პროტესტის ასეთი ფორმისთვის მიემართა. “რაღაც პირადული მიზეზით მომიხსნეს სოციალური დახმარება. ვცხოვრობ ქირით, ფეხმძიმე მეუღლესთან და ორ მცირეწლოვან შვილთან ერთად. სხვა გზა არ დამიტოვეს, მშიერი შვილების ყურება აღარ შემეძლო უბრალოდ. მივედი მერიაში და მერთან შეხვედრა ვითხოვე, მინდოდა წამოსულიყო ჩემს საცხოვრებელში და ენახა რა პირობებში ვცხოვრობთ, საიდანაც ალბათ, მალე გამოგვასახლებს ბინის მეპატრონე და მისი თანამშრომლებისგან მხოლოდ დაცინვა მივიღე“-გვითხრა დავით კილაძემ. დავით კილაძე აცხადებს, რომ ადგილობრივმა ხელისუფლებამ, მისი პრობლემის მოსმენის ნაცვლად სიტყვიერი შეურაცხყოფა მიაყენა და პოლიცა გამოიძახა. “გამწარებულ ადამიანს კიდევ უფრო მამწარებდნენ. პრობლემის გულთან მიტანის ნაცვლად პოლიციას უთხრეს, რომ გიჟი ვარ და სათანადო დაწესებულებაში წავეყვანე. მერი არ უნდა მოსულიყო? როდესაც მისი სამსახურის წინ ადამიანი სუიციდს ცდილობს, მან სამუშაო საათების დასრულება უნდა მოიმიზეზოს და არ დაიინტერესდეს რა ხდება? არ მჭირდება მათი დახმარება, ნება იბოძონ და დაგვასაქმონ. მეც და ჩემი მეუღლეც ჯანმრთელბი და შრომისუნარიანები ვართ. არ გვეზარება მუშაობა, მთავარია საარსებო საშუალება გაგვიჩნდეს“-განაცხადა დავით კილაძემ. ის ამბობს, რომ თუ ხელისუფლება და შესაბამსი სამსახური საჭირო ზომებს არ მიიღებს, ისევ დაბრუნდება მერიასთან და დაწყებულ საქმეს ბოლომდე მიიყვანს.